Bilbok “Egurraren herria. Bosque country” kanpainaren geltoki berri bat hartu du, Euskadiko baso-kudeaketa eta baso-egur sektorearen balioa herritarrengana hurbiltzeko ekimena
“Egurraren Herria. Bosque Country” kanpaina ibiltariaren edizio berriko unitate mugikorra gaur iritsi da Bilbora, maiatzaren 8az geroztik Bizkaiko eta Gipuzkoako 9 udalerri zeharkatu ondoren. Erakusketa gunea Bizkaia plazan kokatu da, eta maiatzaren 31ra arte egongo da bertan. Herritarrei zuzendutako proposamen ireki baten bidez, basoak nola kudeatzen diren eta bertako egurra ekonomiaren, jasangarritasunaren eta landa-ingurunearen funtsezko baliabidea nola den gertutik ezagutzeko aukera ematen du. Ekimena dibulgazio-esperientzia bihurtutako unitate mugikor batean garatzen da, eta uztailera arte Euskal Herriko 21 udalerri bisitatuko ditu.
Ibilgailuak material interaktiboak ditu, sektorearen balio-katea ikus-entzunezko eduki interaktiboen eta parte-hartze dinamikaren bidez ezagutzeko aukera ematen dutenak. Ibilbideak egurrez egindako produktuen erakusketa, jokoak eta baliabide digitalak biltzen ditu, baita zuhaitzaren hazkundetik azken produkturainoko ziklo osoa ulertzea errazteko diseinatutako proposamenak ere. Halaber, “Ñupi” pertsonaia bezalako elementu pedagogikoak gehitu dira, bereziki ikasleei basoaren bizi-zikloa eta haren kudeaketa jasangarria ulertzen laguntzeko.
Horrela, herritarrek eguneroko paisaiaren parte diren basoen atzean zer dagoen eta haien kudeaketa jasangarria eraikuntza, altzarigintza edo ontzigintza bezalako sektoreen garapenaren oinarria dela ezagutu ahal izango dute.
“Egurraren Herria. Bosque Country” ibilbide berria
Donostia bisitatu ondoren, kanpainak hiru lurralde historikoetako 21 udalerritan jarraituko du bere ibilbidea. Bilbon (maiatzaren 29tik 31ra) eta Gasteizen (ekainaren 26tik 28ra) egingo ditu hurrengo geldialdiak, eta Euskadiren orainari eta etorkizunari lotutako errealitate garrantzitsu bat herritarrengana hurbiltzeko dibulgazio-ekimen gisa sendotzen ari da. “Egurraren Herria. Bosque Country” kamioiak, besteak beste, Laguardia, Zuia, Amurrio, Deba, Zumarraga, Hondarribia eta Bermeo bisitatuko ditu.
Kanpainak ikastetxe eta elkarteei zuzendutako jarduerak ere barne hartzen ditu, publiko ezberdinetara egokitutako bisita gidatuekin. Edizio honetan, besteak beste, Donostiako EASO Politeknikoa eta Ortzadar Ikastetxea, eta Bizkaiko Mungiako BHIa parte hartuko dute. Saio hauek baso-kudeaketaren errealitatea zuzenean ulertzeko aukera ematen dute, egurraren erabilerari buruzko ideia sinplifikatu edo okerrak apurtuz eta haren izaera berriztagarria, trazabilitatea eta jasangarritasunari egiten dion ekarpena balioan jarriz.
“Egurraren Herria. Bosque Country” kanpainak aurreko edizioan Araba, Bizkaia eta Gipuzkoako 18 udalerri bisitatu zituen, hiru hiriburuak barne. Guztira, 6.429 lagunek parte hartu zuten ekimenean, eta horietatik 1.600 ikasle izan ziren.
Funtsezko sektorea herrialde basotsu baterako
Euskadi Europako lurralde basotsuenetako bat da: bere azaleren %55 zuhaitzez estalia dago, eta horren %49,5 inguru bertako hostozabalez osatua da. Baso-egur sektoreak 19.000 lanpostu inguru sortzen ditu, eta batez ere bertako lehengaian oinarritzen da, konifero eta bertako hostozabalen bidez; horrek indartu egiten du bai garapen ekonomikoari bai ingurumen-jasangarritasunari egiten dien ekarpena.
“Basoen Foru Arau berriak mendia ulertzeko eta kudeatzeko dugun modua eguneratzen du, jasangarritasuna, klima-aldaketara egokitzea eta biodibertsitatea ardatz hartuta. Izan ere, babestea eta kudeatzea ez dira elkarren aurkako kontzeptuak; gure basoak kontserbatzeko.
modurik onena ondo kudeatzea da. Eta ‘Egurraren Herria’ bezalako kanpainek, hain zuzen ere, errealitate hori herritarrengana hurbiltzen laguntzen dute”, nabarmendu du Arantza Atutxak, Ingurune Naturala eta Nekazaritza Sustatzeko Saileko foru diputatuak.
“Egurraren Herria. Bosque Country” kanpaina ibiltariak baso-egur sektorearen eginkizuna Euskadirentzat estrategikoa den eremu gisa kokatzen du. Kontserbaziorako bertako hostozabalen basoen kudeaketak, aprobetxamendu arduratsuak eta espezie osagarrien egurraren eraldaketak balio-kate bat osatzen dute, jarduera ekonomikoa, enplegua eta jasangarritasunaren eta deskarbonizazioaren erronkekin lerrokatutako irtenbideak sortzen dituena.
“Euskal baso-errealitatea askotarikoa da, eta espezie produktiboak zein bertako hostozabalen masa zabalak uztartzen ditu. Azken hamarkadetan hostozabalen presentzia handitu egin da, eta gaur egun Euskadiko azalera zuhaiztuaren ia erdia hartzen dute. Askotan, basoak paisaiaren parte gisa ikusten ditugu, baina masa horien atzean kudeaketa, zaintza, enplegua eta gure egunerokoan erabiltzen ditugun material jasangarriak sortzen dituen balio-kate oso bat daude. ‘Egurraren Herria. Bosque Country’ kanpainaren helburua errealitate hori herritarrengana hurbiltzea da”, adierazi du Baskegurreko zuzendari Oskar Azkaratek.
Euskal baso-egur sektorea baso-jabetzan hasten den egitura batean oinarritzen da; mendien zaintza, birsorkuntza eta kudeaketa aktiboaren arduraduna da hori, eta egurra eraikuntza, altzarigintza edo ontzigintza bezalako esparruetan erabiltzen diren produktu bihurtzen duten baso- eta industria-enpresetara hedatzen da. Kanpainak, hain zuzen ere, ibilbide oso horretan jartzen du arreta, eguneroko paisaiaren parte diren basoen atzean zer dagoen erakutsiz.
Euskadiko basoen zati handi bat titulartasun pribatukoa da; horrek baso-jabeak lurraldearen kudeaketan funtsezko eragile bihurtzen ditu. Haien lana ezinbestekoa da bai ingurunea kontserbatzeko bai industriari bertako egurraren hornidura bermatzeko, landa-inguruneari lotutako jarduera ekonomiko baten jarraipena ziurtatuz.
Kanpaina PEFC Euskadik sustatzen du, baso-ziurtapenean erreferente den erakundeak; honek bermatzen du basoen kudeaketak nazioartean aitortutako ingurumen-, gizarte- eta ekonomia-irizpideak betetzen dituela. Horrez gain, hiru foru aldundien, Eusko Jaurlaritzaren —Elikadura, Landa Garapen, Nekazaritza eta Arrantza Sailaren eta HAZI Fundazioaren bidez— eta Baskegurren babesa du; azken honek Euskadiko egurraren balio-kate osoko enpresak biltzen ditu.