Baskegurrek zuraren balioa nabarmenduko du EKOBILBOn, eraikuntza deskarbonizatzeko funtsezko lehengai gisa
Baskegurrek stand bat izango du EKOBILBOn, Produktu Ekologikoen, Bizitza Osasungarriaren eta Kontsumo Arduratsuaren I. Azokan. Azoka irailaren 25ean, 26an eta 27an egingo da Bilboko Euskalduna Jauregian.
EKOBILBO lehen aldiz egingo da Bilbon. 70 erakusketari baino gehiago izango dira bertan, tartean Baskegur, eta hainbat arlotako eskaintza izango du: elikadura ekologikoa, energia berriztagarriak, ehungintza naturala, kosmetika ekologikoa, bidezko merkataritza eta bioeraikuntza; azken hori bereziki interesgarria da Baskegurrentzat.
Baskegurren hitzaldia
Azokak, gainera, aurkezpenak, erakustaldiak, showcooking-ak, tailerrak eta hitzaldiak eskainiko ditu hainbat sektore eta espezialitatetako adituen eskutik. Horien artean izango da Oskar Azkarate, Baskegurreko zuzendari nagusia. Hark “BASOTIK ERAIKINETARA: bertako zura, eraikuntza deskarbonizatzeko funtsezko lehengaia” izeneko hitzaldia eskainiko du.
Azkarateren hitzetan, “eraikuntza-eredu jasangarriago baterantz egiteko trantsizioa ez da soilik birziklatzean edo berrerabiltzean oinarritzen; erabiltzen ditugun materialen jatorria ere birpentsatu behar da. Testuinguru horretan, zura lehengai naturala, berriztagarria eta hurbilekoa da (0 km), karbono-aztarna murrizteko, CO₂a biltegiratzeko eta ekosistemak kontserbatzen laguntzeko gaitasuna duena”.
Ildo horretan, honako hau azpimarratu du: “Karbono intentsiboko materialen aurrean, zurak benetako eta eskuragarri dagoen irtenbidea eskaintzen du eraikuntza arduratsuago baterantz aurrera egiteko. Haren erabilerak eraikinen ingurumen-inpaktua murrizteaz gain, basoen kudeaketa jasangarria sustatzen du, eta eragin positiboa du lurraldean”.
Hitzaldian azalduko da nola den bertako zura bioekonomiaren eredu zabalago baten parte, ingurumen-, ekonomia- eta gizarte-irizpideak uztartzen dituena. Era berean, eraikuntzarako alternatiba eraginkor gisa duen eginkizuna aztertuko da; gero eta industrializatuago dagoen aukera da, eta sektorearen egungo erronkei erantzuteko prestatuta dago.